|
|
Les soçnaedjes di Djiblou Rencontres-conversation wallonophones à thèmes de Gembloux. |
||
|
|
Les soçnaedjes di Djiblou Rencontres-conversation wallonophones à thèmes de Gembloux. |
||
Dressêye:
Po l'23 di jun socenadje à Djiblou dji prîye èto à costé d'André Lamborelle one soce qui fét do vin à Bouge avou Michel Hubert èt l'gran Châle "Lès Coteaus di Moûse".
Po l'visite do molin à Grand Leez li sèmdi 5 di may, après l'visite èt li causadje da Mr Philippe Lebacq dissus lès viladjes di Ptit èt Grand Leez, l'ptit socenadje au bâr èwou-ce qui dji compte su lès fåves da Christine èt Châles.
"2001, anéye dès p'tits lingadjes. Quène place po l'Walon dins l'monde
di l'audiovisèwèl ?"
Priyîs: One au minisse Miller, Châles Massaux po 900.000 walons, Jany Paquay, Walons-nous, Mr Fontaine RTBF Lîdje, li fédrérâcion dès tv rédjionales, Canal C, Canal Zoom, TV COM, Telesambe, RTC Lîdje.
Le samedi 24 février à 14h, venez fraterniser en wallon avec "Les
Tanteulesî"s et les invités ci-dessous sur le thème :
"2001, année des langues endogènes : quelle place pour le wallon dans le
monde de l'audiovisuel ?"
Sont invités, les ministres Rudy Demotte et Richard Miller, les directeurs de télévision, radios, "nationales" et régionales et beaucoup d'artistes du monde du cinéma.
L'introduction de la réunion sera faite par Valmy Féaux, père du décret de protection des langues endogènes.
Toute l'après-midi, il est souhaité d'essayé de parler en wallon, les auditeurs sont les bien-venus.
Do WALON à DJIBLOU
Li sèmedi 12 di décimbe deûs-eûres di l'après non.ne à quate-cink eûres dè l' vèspréye
Le samedi 12 décembre après-midi de deux à quatre-cinq heures
Sakants Waloneus mètenut su pîds one chîje k'on lome :
Quelques Walloneus organisent une veillée appellée
COPINADJE
(rencontre et conversation)
Tos lès waloneûs di Moûse, d'Arton, d'Orneau èt co pus long, sèront priyîs di causer è walon po bin fé, mins lès chôuteûs sont lès binv'nus èto.
Po-z-animer li chîje, nosse soçon PAUL GILLES, folkloriste èt coanimateûr di l'èmission Radio " noûf cint mil Walons " nos causerè dès :
TRADICIONS èt ÛZANCES d'avaurci
Traditions et coutumes de notre région
Lès soçons sont-st-invités à aprèster è Walon on p'tit bokèt dissus lès tradicions, fièsses èt ûzances di leû viladje ou di leû kârtier po rinde li causadje pus aujî.
Nos waitrans d'apwârter nos idèyes po disfinde nosse lingadje, nos ûzances èt nos tradicions d'ayîr mins ossi d'asteûre.
Quelques lignes à propos des coutumes, fêtes et traditions de votre village ou quartier, hier et aujourd'hui, pourront faciliter la conversation. Les participants qui souhaitent simplement écouter sont les bienvenus. La veillée sera animée par Paul Gilles, coanimateur à la RTBF de l'émission radio" noûf cint mil walons ".
Li 30 di janvî dj'a c'mincî li dérin raplou, tot lîjant li p'tit bokèt-ci " Li téyâte Walon, on mwârt bin vikant " èt li profèsseûr Jean-Pierre Hiernaux a fait s' causadje. Come on bon maisse di sociolodjîye, il a d'né one clapante èspliquéye do fénomin.ne do téyâte è Walon. Adon, lès cink soces ont fait on présintâcion avou des skètches èt dès fauves : Kévin Marneffe po l' Cercle dramatique Concordia des Isnes, André Rousseau a rèspondu à one djon.ne actrice dè l'Amitié Sauvenièroise, èt lès Kinikes nos- ont djouwé one pitite paskéye. Deûs powézîyes ont stî dites pa André Rousseau et Albert Lemy. Lès fauves ont tchèyu foû dès lèpes da Charles Fourny, Compagnie Aimé Courtois, Joseph Daffe, Lès vrais amis d'Malonne, Henri Guidon, Concordia dès Isnes, Paul Gilles èt dès soçons qu'estin.n' dins l'sale. On-z- a rî plin s' vinte. Li copinadje a continuwé avou l'Paul Gilles qu'a dmandé aus djins ç' qui pinsin.n' do cayèt. I gn-aveut one pèkléye di djins, 60 soçons, èt dj'a dvu aler r'qwêre dès tchèyêres. Tot çoula po dîre qui l'chîje a fwârt bin toûrné.
Li côp qui vint, Li sèmedi 10 d'Avri, au mitan dès condjîs d'Pauque, di deûs eûres après non.ne à 5 eûres à l'nêt, nos- alans tûzer à ç qui l'Walon va div'nu :" Qué Walon po d'mwin ? " ci sèrè l'tite di nosse trwèsyin.me socenadje, à Djiblou.
C'èst ossi l'tite do lîve qui l'Ranteûle a-st-aplêdé èmon Quorum èt qui sèrè présinté ç'djoû-là.
Sèront priyîs po-z-è d'viser au Foyer communal, salle n°1, à l'gauche mwin do ;batumint :
Chantal DENIS, Profèsseûr di Walon à l' sicole dès Rèlîs Namurwés èt à l' sicole comunale di Ligny, qui nos causerè di s'-t-èspéryince di maisse di scole èt dji causerè come scolî, do rapurdadje do Walon.
Lès Ranteûlîs Lucyin MAHIN, Bernard LOUIS, dès walons scrîjeûs èt r'qwêreûs, qui nos vont d'ner leûs- idéyes po l'Walon di d'mwin.
Po z-animer l' chîje, Paul GILLES, animateûr di l'èmission radio " noûf cint mile walons ", apwârterè s' bone umeûr èt sès fauves, to d'nant l' parôle aus priyîs.
Tos lès Waloneûs sèront priyîs d' causer è Walon po bin fé, on pout fé dès fautes, mins lès choûteûs sont binv'nus èto.
Paf : apwârter s' bone ûmeur, sès fauves, èt sès- idéyes po disfinde nosse bia lingadje.
Po-z-è sawè d'pus tél 081/60068 dispus cink eûres;
ôrganisâcion : Li Ranteule, soce nin ricaurlante
Aplêdeû agadjî : Yves Paquet, 165 rue de lonzée, 5030 Gembloux.
Au plaiji di s'rivoûy.
On ptit compte rindu del bate di dvize: Li walon e scole: obligatwere ?
Li socenadje - causadje do 5 di djun
(le samedi 5 juin rencontre et conversation)
Po nosse quatyin.me socenadje, nos d'viserans avou
Lorint Hendschel, waloneu
Louis Michel, Prezidint des liberås (Federåcion P.R.L.-FDF-MCC)
Josy Dubie, did mon ls Ecolos.
Maurice Bayenet, Vice-Prezidint des Socialisses (PS)
Pierre Peeters, des Noveas Catolikes (PSC)
Marcel Guisset, scabin del veye di Djiblu.
su l'tin.me :Li Walon, lingadje d'one réjion è l'Eûrope.
Li Ranteûlî Lorint HENDSCHEL, filologue, linguisse, è-st- ossi on fèl sicrîjeû, (écrivain) on r'qwêreû (chercheur) èt on maisse è Walon.
I nos causerè di nosse projèt qui waite di fé do Walon on vikant lingadje o vint-yonyin.me siéke, à costé dès-ôtes lingadjes réjionaus come l'Aragonès, Lou Provençou, li Catalan, Li Breton ètch ètch....
On r'présintant d' chaque pârti politique sèrè priyî po v'nu èspliker, è Walon bin sûr, comint on-z-a l'idéye di disfinde nosse lingadje dins s'pârti.
Lès priyîs rèspondront, todi è walon, aus quèstions dè l' sale.
Li copinadje èst mètu su pîd à Djiblou, au Foyer Communal, place A. Lacroix, sale n°1, li sèmedi 5 di jun, di 2 eûres après- non.ne à 5 eûres à l' vèspréye ( la réunion aura lieu le samedi 5 juin de 14 heures à 17 heures).
Li Ranteûle a l'dâr di présinter aus Pârtis èt aus Omes Politikes on Cayié di r'vendicâsions avou dès acsions à fé po rinde nosse lingagje bin vikant.
Il èst rèquis d'causer Walon po bin fé, mins lès choûteûs sont binv'nus èto.
Apwârtoz vos fauves èt vos quèstions.
Paul Gilles, coanimateûr di l'èmission Radio RTBF " Noûf cint mile Walons " èt Yves Paquet, Ranteûlî, vont mwinrner l'chîje dins l'bone umeûr bin sûr.
Po-z-è sawè d'pus tél 081/60.00.68 èt O81/56.60.40.
organisâcion : Li Ranteûle, soce nin r'caurlante (A.S.B.L.)
aplêdeû agadjî : Yves Paquet, 165 rue de Lonzée 5030 Gembloux
*************
Lète aus Ranteûlîs,
aus Soçons qu'ont v'nu aus Copinadjes à Djiblou,
aus Waloneus :
Djiblou, li 3 di Maiy 99
Bondjou,
Li raploû qui vint, li 5 di jun, èst mètu su pîd po nos rachoner ètur Waloneûs èt-z-arin.ner lès politiquîs d'vant lès-élècsions. Saquants d'zèls ont d'djà rèspondu à l'invitâcion ( gn-a on présidint d'pârti). I vont causer è Walon di ç qu'il ont dècidé po disfinde nosse lingadje.
A nos-ôtes à l'zî mostrer dès vôyes èt dès-afaires à fé. Po coula li Cèlule Politique dè l' Ranteûle à l'dâr di présinter aus pârtis on " cayé di r'vendicâsions " avou dès acsions à fé come par ègzimpe : - li Walon è scole qui compte po dès ponts su l'buletin, dins l'administrâcion (mâriadjes, papîs, ... ), à l'èglîje, lès noms dès rûwes, à la T.V., à la Radio, dins l'Culture ( tèyâte, tchansons, marionètes....) ètch ètch. Scrîjoz vos-idéyes èt m'lès avoyî d'vant l' 15 di maiy, 165 rue de Lonzée 5030 Gembloux. Ni fioz pont d'litèrature mins aprèstoz dès propôsicions po fé d'nosse Walon on vikant lingadje.
A pus taurd.
Yves Paquet
Do Walon à Djiblou
l'A.S.B.L. Li Ranteûle a le plaisir de présenter un cahier de revendications pour la sauvegarde de la langue Wallonne. Il sera remis aux différents représentants du Monde Politique qui ont aimablement accepté de participer à notre quatrième " Socenadje -causadje (rencontre-conversation) " qui a lieu au foyer Communal de Gembloux le samedi 5 juin de 14 à 17 heures, en présence de Représentants des divers Partis Politiques Walons, de Représentants de la Ville de Gembloux et de défenseurs de la langue Wallonne.
Li Ranteûle, soce nin r'caurlante, a l'dâr di présinter li sèmedi 5 di jun, di 2 eûres après-non.ne à 5 eûres à l'vèspréye, aus Pârtis èt aus Omes Politiques, on cayié di r'vendicâsions, avou dès acsions à fé po rinde nosse lingadje bin vikant dimwin dins nosse Walonîye come Réjion è l'Eûrope.
L'introduction au " Copinadje " est faite par Lorint Hendschel, membre dè l'Ranteule, philologue et linguiste, qui exposera en Wallon sur le thème
Li Walon, lingadje d'one réjion è l'Eûrope, au vint-yonyin.me siéke.
Po nosse quatyin.me socenadje, nos d'viserans avou Lorint Hendschel, Ranteûlî, filologue, linguisse, k' è-st-ossi on fèl sicrîjeû, on r'qwêreû èt on maisse è Walon. I nos causerè di nosse projèt qui waite di fé do Walon on vikant lingadje o vint-yonyin.me siéke, à costé dès-ôtes lingadjes réjionaus come l'Aragonès, Lou Provençou, li Catalan, li Breton ètch ètch....
La rédaction du cahier de revendications est faite avec la collaboration de, li cayié a stî scrî avou l'copladje da:Jean-Claude SOMJA, Lucien MAHIN, Johan VIROUX, Roger VIROUX, Laurent HENDSCHEL, André LAMBORELLE, Yves PAQUET, Joseph LAHAYE, Bernard LOUIS
et fait référence au livre " Qué Walon po dmwin ? Eradication et Renaissance de la langue Wallonne ", ouvrage collectif réunissant 23 auteurs, paru sous la direction de Lucien Mahin, aux éditions Quorum, en mars 99 et du feuillet rédigé par Jean-Claude Somja, " Langue Wallonne, Pour une réhabititation ", édité en 96.
Dispus l'causadje, nos-omes politiques nos vont èspliquer è Walon bin sûr, comint on-z-a l'idéye di disfinde nosse lingadje dins s'pârti. Lès priyîs rèspondront, todi è Walon, aus quèstions dè l'sale.
Suivra un exposé de chaque invité représentant le Monde Politique qui expliquera comment il pense mettre en oeuvre des moyens concrets pour défendre la langue Walonne. Un débat clôturera la rencontre.
Il èst rèquis d'causer Walon po bin fé, mins lès choûteûs sont bin'nus éto.Les communications et échanges se feront exclusivement en Wallon.
Paul GILLES, coanimateûr di l'èmission Radio RTBF " Noûf cint mile Walons " èt Yves PAQUET, Ranteûlî, vont mwinrner (animeront) l'chîje (la rencontre) dins l'bone umeûr bin sûr.Po-z-è sawè d'pus té 081/60.00.68 èt O81/56.60.40
A nos-ôtes di nos mostrer ci djou là, i faureut one masse di djins po mostrer aus Politikîs qu'on èst vikant
A pus taurd
yves
Ça a bin stî valèt, ça a bin stî. I gn-aveut 60 djins, lès omes politikes éstin.ne là. To a bin roté ét li Ranteule s'a bin pwârté. Dispus coula è mougnant on a tûzé à l'idèye da J.P. Hierrnaux di fé one saqwè à Nou Lovain, dji so binauje soçon, i gna ieu li RTL, Canal ZOOM, Agence Belga, Vers l'avenir, ét to lès pârtis èt lès politikîs di Djiblou. A rveuy soçon, li maisse raplou sirè à Djiblou li 9 d'octôbe si to va bin. Dji m'va mi rpwaser one miète di tote li bèsogne, dji so binauje. Yves.
Yves Paket, li 5 di djun 1999. Sol djåspinreye Viker.
Binamés soçons,
Dimegne k' est evoye, dj' a veyu li rpoirtaedje d' 13.00 k' a fwait RTL-Tvi sol raploû di Djiblou.
Et dj' a sty tot binåjhe cwand dj' a rmårké ki li rpoirtaedje a sty fwait tot e walon : do lijhaedje do djournalisse djuska li tecse sol waitroule.
Et dji doet dire ki ça chonne vormint bea li walon å posse, po ôte tchôze ki les sampiternels bistokes disso li teyåte ouben li tchanson walone.
Waity on rpoirtaedje e walon a RTL, ça m' a fwait li minme efet ki cwand dji rwaite après li djornal lucsimbordjwès da Club-RTL : "un bien fou".
Cist afwaire a prouvéye ki li walon ça pout siervi tos les djoûs, minme dins on djornal televizéy, et ki gn a pont d' råjhon po n' nen fé on rpoirtaedje tchake djoû å djornal.
Et dji n' vou k' ene tchôze : do walon å posse, del reclame djusk' al meteyo.
Greetings from Wallonia - Bondjous did Waloneye
Stephane Dohet, li 7 di djun 1999, sol djåspinreye Viker.
Ayir dj' a vèyu dissus canal zoom (tv di nosse rédjion) li bia rportadje 7, 8 minutes au long. Dj' aveûve dédja rwaiti RTL, c' esteut bin mins nos soçons di zoom on bin fé l' cayèt, one miète pus long. To monstrans nos omes politikes qui arivinne to causant Walon. Claude aveut d' meuré au foyer po l' z-î mostrer l' vôye. On vwè li Louis Michel qu' arive taurdu, èt lès ôtes politikis qui causenut. Après l' assembléye, on véyeu tote li pèkéye, ètur lès 60 djins: nosse Paul qu' aveut mètu si bèle djane cravate, André qui causeut au micro, Djôsèf, Bernard, Esther, Josi èt au fond dè l' sale Madame Back. Dj' aveûve apwârté mi banse po mète lès fautes. Di l' ôte costé, Pire èt nosse soçon di Bertrès. I gn aveut èto one cope k' a vnu dè l' Arerland. Li Mosieu nos a causé one miète è Lucsambourdjwès. Jean-Pire esteut au prumi rang adlé Marie èt Chantal qu' a ataké avou l' prûmire question dissus l' walon è scole. Raymond riyeuve di totes sès dints quand Djôsèf a pris l' parôle. On vwèt li bronzéye tièsse di m' gamin qui done lès cayîs di rvindicåcions aus djins dè l' sale èt m' feume padri l' bar a costé d' Alain. "C' èst teribe" dit-st-èle mi feume "come i gn a dès similitudes ètur ci qui s' passe avou l' walon èt ci s' passe avou li front Zapatistes qui disfind lès indyins do Chiapas. " Dji continuwe di tûzer a c' afère la. Nos ôtes nos n' avans pont di "ladinos" mins lès Espagnols estinne la amon nos-ôtes quand i estinne au minme momint au Mexique. Ça î rchone min c' èst co one ôte afaire. Lès cias qu' on mètu li walon a l' abat, c' èst lès Walons zèls minmes. Lès indyins do Chiapas, i sont fîrs di causer totzile. Minme si i n' ont rin a mougnî, i savenut quî çk' est l' ènmi. Nozôtes, i nos faut nos rgârder dins one glace po l' trover. I faureut qu' on tûze a cite afère tortos èchone avou Jean-Pire Hiernaux au Nou-Lovain po sôrti on esplikadje socio-psikanalitike do fénominne qui s' a passé avou nosse lingadje. Asteûre qui dj' a fini avou li ptit momint èwouçki dj' a sintu l' vude après m' awè cotapé (one èspèce di déprèssion post-partum d' après socenadje), dji pou cminci a tûzer a ç qui s' èst passé sèmedi. Cwè tûzer dès rtchaiyures do raploû? Li walon a gangnî on bon mète. Nosse Lorint a stî come dji l' ratindeu: djonne èt fwârt po causer do walon dins on walon qui vike. Au posse, on a rwaiti on "spécialisse" qu'a dné one nouve louke do lingadje walon. Li walon n' èst nin mwârt, il èst malade a-t-i dit come do djusse tot li dnant one novèle imaudje. Dins l' sale, gn aveut dès pus viys èt dès pus djonnes, wêre d' èfants, dès politikîs fédèraus, rédjionaus, dè l' vile : Li maieur, deus conseyîs, on scabin. Avou Michèle Gabriel, on z a èvoyi 65 cayîs di rvindicåcions dins lès pârtis èt lès médias divant d' ataker li copinadje éwouçqu' on a rmètu 50 cayîs aus djins qu' estinne la. I gn aveut trwès "TV" avou canal C, one radio RTB-F, l' agence Belga èt lès gazètîs. L' idèye va fé si tchmin paujèrmint. Asteûre, lès omes politikes n' ont rin promètu. Oyi, c' èst l' vré. Ca vout dîre qui nous faut rataker, come dijeuve André Lamborelle divant lès èlecsions communales èt di totes lès places dè l' Walonerèye. Dins lès pârtis on va tûzer di nosse cayî mins i nos faut rboucher dissus l' clau. Au Bambwès, Roger qui come Lucyin va rchûre one cassète, vout fé one saqwè po continuwer l' acsion. Bone idèye. Au coron do raplou, to mougnant a Djiblou, on s' a mètu d' acwârd po fé one chîje (mini coloke) au Nou Lovain. Dji m' rafîye di yèsse a l' Agora ou dins lès auditwères Sinte Båbe po fé li prumî coloke è walon au Nou Lovain. Atincion lès soçons on n' pout nin fé berwète come dit Lorint. I nos faut one équipe po l' aprèster, dès ptitès mwins èt dès tièsses bin plinnes po yesse sûr d' awè dès djins po causer et vnu choûter, dès médias, dès causadjes po dîre one sacwè d' bin, d' vikant, di noû etc... Kiski vout bouter dissus one parèye idéye avou mi ? K' èst-ce qui vos chone di c' idèye la lès Ranteûlîs ? Tiri ou Lorint si c' èst possibe por vos, vloz bin m' coridji èt mète ci bokèt ci dins l' Ranteule qui va rèche. A rveuy Ranteûlî èt soçons da viker, asteûre on pout s' bistoker tortos, nosse raploû a bin roter, dji so binauje. Aprestans on ôte qui sèrè co mî au Nou Lovain,
Yves Paket, li 10 di djun 1999. Sol djåspinreye Viker.
Li place dè l' Tchanson dins l' Culture Walone.
Li sèmedi 18 di décimbe 1999 socenadje-causadje dissus l'tin.me : Place dè l'tchanson dins l'Culture Walone avou au coron, à l'nût, 7 eûres 30, on cabarèt Walon:
Causadje-Socenadje di walon a Djiblou
so l' tinme :
Li place dè l' Tchanson dins l' Culture Walone.
One tchanson è Walon po l'Eurovision ?
Saquants ârtisses dè l' Tchanson walone sèront la, pou d'viser avou nos-ôtes au socenadje :
lès tchanteûs(es) Claudine Mahy, Corine Volon, Dino Forlane èt li parolî André Gauditiaubois.
Guy Cabay nos causerè di 20 anéyes di tchanson è Walon èt di s' dérin.ne plake (CD).
Lorint Hendschel, nos va présinter li CD Walon " Èmacralèdje " : 15 tchansons walones d'asteûre.
Pou socener avou lès ârtisses, causer èt rusponde aus quèstions dèl sale,
nos r'çûrons : Philippe Anciaux, dirècteûr du Cente culturèl di Seraing, èt
Claude Bonde, rèsponsâbe de " Charleroi chanson, Communauté française de Belgique "
Bate di dvizes sol tchanson e walon
A 19 eûres 30 :
Grand Cabarèt Walon
Avu è prumîre paurtèye :
Blues èt Jazz Walon, avu Corine Volon,
Varièté èt Gospel è Walon avu Claudine Mahy, Crand Prix dèl Tchanson Walone.
Avu è 2ime paurtèye : Prèsantâcion du CD : 15 Tchansons walones pa :
Lorint dèl binde René Binamé
Rock èt arguèdin.nes walones
Bruno Picard
Grand Prix dèl Tchanson Walone. Balades èt arguèdin.nes è walon
Dino Forlane Bleûse Binde
Blues è walon d' luxe
De : schoovjose <schoovjose@worldonline.be>
À : viker <viker@onelist.com>
Date : dimanche 19 décembre 1999 15:06
Objet : DJIBLOU;18.12.99; CABARETWALON
Dji ratake don. Li socenâdje fini, on-z a bagué les tcheyêres. Rimpli les assietes et après nos vintes. Nosse Ive di Prezidint n' avéve nén rwêti a ene trintche di djambon, di tiesse presséye ou d' boudin. Avou l' amougnî amwinrné, i n' faléve nén s' bate pou awè s' pårt. Les boyas bén calés, on poléve vôy vinu. Vos fåt dîre etou qui les boteyes da Lamborele estîn les bé-"vin"-euwes pou fé mia qui ramouyî les gozîs.
Tot l' monde (enfin, sacants) s' a metu a disgadjî les tåves et fé l' bagâdje. Tot avéve sitî bén emantchî. Les tchanteus, les musicyins, les eletricyins son-st arivés bén a timp. Les guitâres acwardéyes, les micrôs a l' boune wôteu et l' restant a l' avnant, on a comincî a l' eure. Come on avéve veyu lådje, i n' si faléve nén bate non pu pou s' achîre. Les coûdes et les djambes avîn li place qui leu rivnéve. Bernard Lowi, l' cårli, sa metu a l' intréye pou rwêtî a n' nén leyî rintrer des reskiyeus et l' Ive a douviet l' cabaret (nén l' bâr, sot, li concêrt !). S' bouye a stî bén faite.
C' e-st ene bele båchele qu' a ataké. Jessika qu' ele si lome et dedja a fait ene fwate impression dins ses blanks mousmints. Avou ses tchansons "Li Soûdârd" et "Maladîye di djonesse", ele rimplacéve Corene Volon. Pol gletéve. Ele n' a nén wazu l' espêtchî di lî doner in betch.
L' Blue' s binde a chût. A quate (Imbursin, Rôsé Sé, Ta-on, Pietro Vitolet ?) et djouwer, "Bronson ' s blue", l' "Ostel do cu toûrné"," Evoye Blues" et "Taije-tu ene miete". Is ont yeu do suksès (et fé do brût) ostant qu' a Forest Nacionâl. (M' ont rfilé in CD qu' est nén e walon).
Pou chûre, Clodine Mahi a prit (cåzu) tote leu place a leye tote seule. Avou, "Neyî dins les bidonviles", "l' årtisse", "Mossieu", "Priyêre d' ene droguéye", "Dj' a fwin" (on l' comprind !), "Sara des poubeles", "Blues di ti", "Mémé loubârd" et fini avou "Châlerwè". Avou leye etou, on-z a yeu pou ses cårs ! Ele si done et ele fait l' pwès. Tchapia, Mémé !
Come i faléve fé del place et rsatchî les instrumints, on a fé toubak li timp di vûdî in vere ou deus et d' plinde les djins qu' avîn li twart di n' nén yesse la. Chûvoz mi rgârd...
A l' ratake, momint d' ene pitite gote a l' ouy... "Payi d' Moûsse" tchanté pa Urinda (avou li ptite pwinte d' aksint meksikin; in delice !) avou Lorint a l' guitâre. Nåji, i n' s' a nén rilevé et dimerer su place pou tchanter, mierseu, "l' vî blank tchvå" (lî måkéve ene rime a djaspine), "Djîle Copiche", "Evoye pou l' Amerike"...
C' est Bruno Picârd qu' a fini pa in trionfe avou "Dji su ene pôve ouline toute seule" (e cwè, Lucyin, on dmere a brêre tot seu ?), "Li berdjî" (qu' a reweyî des sovnances amon l' Pol), "Dji t' inme Marîye Djane" et l' "Dêrin Vweyadjeu"...
Pablo finichéve li bagâdje, Djan-Pîre ene boteye, Lowi sayéve di fé les contes, Lamborele rascoudéve les vûdes boteyes, Goditiwôbwè pinséve a çu ki lî va tchêre del Sabam, Ive pinséve dedja a fé su in pu grand pî...
La, dj' estéve sicran, les mwins infléyes d' awè tapé ddins, i comincéve a nîvter. Dj' a peté evoye. Dj' a yeu deur a trover l' uch. I m' faléve ascôchî les djins qui rclamîn des "ortografes"... Dji m' a bén plai, mins ça va yesse deur di rfé ossi bén tos les chîj mwès... Si ene sacwè mi rmonte co, dji vos fé l' promesse di revoyî ene E-lete. Asteure, dj' a bén gangnî di fé plandjêre Nonna ? A pu tård, José.
PS. Dj' avéve roviyî di dîre merci a Lorint pou m' vere gangnî, et prometu, i gn a dedja sakants mwès. Bén des grâces, Lorint !
PS. Prezidint, i n' vos fåt nén awè peu di m' coridjî et d' mete li pîce s' i gn a des trôs.
(Back homepage) Alans rzè al mwaisse-pådje
