Rantoele 71



* Croejhete

* Noveas lives e walon ey e gåmès

* Bates

* Avion djus e l’ Oucrinne (Pablo Sarachaga)

* Pogrom a Rhaza (Lucien Mahin)

* Sicrijheu itålyin amon nozôtes (Emile Pècheur)

* Fotbale e Braezi (Jean Goffart)

* Notru-Dame d’ awousse (Georges Sfasie)

* Binde d’ Imådjes : Totlravi (4) (José Schoovaerts)

* Belès Letes e walon :

** Les sours Mondju (Jacques Desmet)

** Li pa do tenismane (2) (Lucien Mahin)

** Li molén d’ Djerpene (Jean Goffart)

* Fors å pwin (Louis Baijot)

* Franwal di Lidje (François Nyns)

* Aprindisses sicrijheus(es) (Joëlle Spierkel, Mady d’Orcimont)

* Reyaccions d’ lijheus del Rantoele 70 (Christian, Daniel, André, Achile)

* Rôze calpin (Jacques Werner)

* Fåves (Christian Thirion)

* Fime so les cmeres ås cmandes (Georges Sfasie)

*************************

Croejhete

Dins nosse gazete, nos metans å pus sovint li prono coplemint divant l’ aidant viebe. Nous suivons la règle d’antéposition du (des) pronom(s) complément(s) par rapport à un verbe auxiliaire. Cette règle, flottante au 20e siècle, a été réencouragée dès 1900 par plusieurs sociétés littéraires. Dji n’  vos l’ såreu dire / i nos a vnou trover / ti n’ el oizreus aduzer / ele mi va vni cweri al gåre / i vs les polnut ramasser / dji l’ aléve dire divant vos.

Novea live e walon

« Intrez don…e scole » : On live ki rprind des scrijhaedjes foû abondroets, atuzlé pa Françwès Nyns po les scoleus(es) do walon (diné po rén a 60 mwaisses et dames di scole di Gråce-Bierleu et Serè). I comprind troes bokets : (1) 240 boignes messaedjes (contenes et rime-rame d’ efant); (2) « li lingaedje des fleurs » da Djôzef Vrin; (3) « li motlî des ptits nos lidjwès » da Yopôl Tchåmont & Djôzef Dofrexhoe. Vos l’ poloz aveur po 3 uros + evoyaedje adlé Françwès Nyns, 34, rue Bois Malette, 4460 Grâce-Hollogne (tel. 04 231 20 00). Novea live e gåmès « Vinoz è vs tchåfer e l’ bele tchambe » (çou ki dene, e gåmès : « ‘Nez-a v’ tchauffi au pèle »). Des tecses e gåmès, avou ene sitroete plake po-z ôre çou k’ on lét. Po l’ awè, emiler a contact@museedelaparole.be.

Bates

Bate del kiminålté Walonreye-Brussele. Deus pris, di 2500 uros tchaeke. Li prumî po ene pîce di teyåte nén eplaideye divant li 31 di decimbe 2011. Li deujhinme po ene ouve odiovizuwele ou dessinrece, nén eplaideye divant li 31 di decimbe 2012. A-z evoyî divant l’ prumî d’ decimbe 2014 a Nadine Vanwelkenhuyzen, 44 Bolvård Yopôl II, 1080 Brussele. Racsegnes : bernadette.jassogne@cfwb.be; anne.pirson@cfwb.be Bate « on scrijheu... on djheu/ ene sicrijheuse... ene di­jheuse » (Un auteur… une voix). Ciste anêye ci, gn a on tinme oblidjî : li guere et les margayes. Les tecses (inte 20 royes et deus pådjes) divèt esse rintrés (6 egzim­plaires sins scrire si no, apus k’ dins ene cloyowe ewal­peure avou si ådje et si adresse) divant l’ 15 d’ octôbe 2014 amon : Annie Rak, Rowe do govien­mint, 15, 7000 Mont

*************************

Eternåcionå : Oucrinne

Maigret et l’ prezidint

Ni codjåzez nén tant li « Fesse-bok ». On trove pacô des scrîts foirt ahessåves, so cisse waibe vola. Come ci-ci, la ki l’ inspecteur Maigret va trover l’ novea prezidint d’l’ Oucrinne, et lyi dmander cwè so on rlomé areyoplane indonezyin... 

Inspecteur Maigret (IM) - Monsieu Porotchenco, dji so l’ inspecteur Maigret, del criminele di Lidje, dji vs vôreu dmander sacwantès kesses.

Prezidint Porotchenco (PP) - So ké sudjet, ô ?

IM - Åd fwait do Boyigne k’ a stî tapé djus.

PP - Tot a ddja stî dit, les dislaxhiveus…

IM - Oyi c' est clair, les separatisses… Mins come dit m’ feme, fåt k’ i n’ dimeure vormint pus nole coine d’ ombrire

PP - Kénès coines d’ ombrire ?

IM - Troes côps rén, rapåjhîz vs, dji fwai-st ene inkete di rotene... dins ciste afwaire, i gn a-st on pont ki m’ tourmete.

PP - Ké pont ?

IM - Bén vola, el Boyigne a disparexhou d’ ezès radårs a 17 eures 15. Vos dclårez ene dimeye eure pus tård k’ il a stî distrût pa on missile sol-air rûsse del sôre…, dji n’ sai pus kéne sôre, et k’ il a stî saetchî påzès dislaxhiveus d’ après Doniesse.

PP - Oyi, et adon ?

IM - Bén, dijhoz, gn a l’ avion ki broûle co, eyet… comint poloz vs saveur comint et pa kî k’ il a stî bouxhî djus.

PP - C’ est sémpe, il a toumé dins ene zone dizo controle des separatisses.

IM - C’ est ene esplikêye… mins les separatisses... il ont cisse sôre d’ éndjolreye la, zels ?

PP - Taiss k’ åy. Li prouve, il ont tapé djus troes ôtes avions dvant çoula.

IM - Bén seur, mins dijhoz m’, ces avions la ont stî saetchîs djus a moens d’ 3.000 metes. Po çoula, èn ekipmint a poirter so li spale sufixh. Mins l’ Boyigne, lu, i voléve 10.000 metes hôt.

PP - C’ est kine.

IM - Bén djustumint neni. Voeyoz vs, dj' a on sorodje ki cnoxhe bén ces agayons la. Il a stî e l’ årmêye e l’ Almagne. Eyet loukîz bén ki…

PP - Nén tourner åtoû do pot, s’ i vs plait, inspecteur !

IM - Bén po saetchî djus ene avion ki vole 10.000 metes hôt, i fåt des missiles adaptés, so des camions saetche-missile, avou èn ôte camion pol radår, et tote ene tchinne di cmandmint. On-z est bén lon do ptit missile k’ on pout tiper so si spale. Adon, dji vs ridmande, est çki les separatisses, il ont cisse sôre di stocaesse ekipmint la ? Et co, est çk’ i s’ endè sårént siervi ?

PP - Bén oyi ! Bawaite ! I nos l’ ont hapé.

IM - Come di djusse ! C’ est dit dins on comuniké di vosse ministere a 17 eures 21, ça fwait 6 munutes divant ki l’ avion n’ disparexhe des radårs. Comint savîz vs k’ i vos l’ avént hapé?

PP - Taiss ki nos foices so plaece nos ont racsegnî !

IM - Proficiate, vos avoz ene årmêye ki reyadjixh foirt abeye. Mins ç’ côp la, èm feme m’ åreut yeu dit…

PP - Åd fwait, inspecteur, åd fwait.

IM - Wice ki ces missiles la ont stî hapés ?

PP - Dins l’ secteur des batreyes [combats] dji supôze, dji n’ sai nén co cwè å djusse.

IM - Et comint çk’ il ont stî hapés ? On comando a-st arivé catchetmint, a saetchî so les sôdårds, a tapé des gurnådes, a mitrayî les instalåcions ?

PP - Oyi, metans. Oyi, c’ est pår çoula. Il ont-st ataké k’ on n’ s’ î atindeut nén. Dji pinse k’ i gn a yeu bråmint des moirts

IM - Bén seur ! So dju biesse, mi ! Mins nerén, dj’ a-st on neveu ki djowe a on sfwait djeu. Sav, ces djeus la ki plaijhèt bråmint åzès djonnes. I s’ tuzèt des comandos et ça saetche totavå. Mins m’ neveu m’ a dit, cwand dji lyi a djåzé do scrotaedje des missiles : « ça est nén possibe ».

PP - Pocwè ? cwè ndè pout i saveur, lu ?

IM - On n’ eploye nén des gurnådes, et on n’ saetche nén al mitrayeuse a costé d’ missiles di cisse grandeur la. I sufixhreut d’ en seule bale al mwaijhe plaece, et tot l’ payis di ttåtoû sereut a bosses et a fosses. Mande escuze, Prezidint, des sfwaits missiles n’ årént nén polou esse hapés.

PP - Abén, c’ est ça ki vs tuzez ?

IM - I n’ a nén djusse çoula, Prezidint. Gn a-st ene ôte kesse ki m’ racatoûne e l’ tiesse. Pocwè årént i hapé des sfwaits missiles ?

PP - C’ est clair come di l’ aiwe di rotche : c’ est po taper djus nos avions.

IM - Mins i volèt-st a basse hôteur, les vosses, et po ça il ont po fé. Mins il årént foirt målåjhey po rashonner les djins capåbes di saetchî ces gros missiles la. Et lzès saetchî so cwè, la ki ça n’ sereut nén siconte les avions da vosse ?

IM - C’ est po djonde des bombårdîs stratedjikes.

IM - Mins vos n’ nd avoz nén des sfwaits !

PP - Il ont bén tapé djus èn avion d’ lene…

IM - Avou des missiles k’ i n’ ont nén polou haper et k’ i n’ polént nén mete e-n ouve ?

PP - Po-z ahiver ene margaye eternåcionåle.

IM - K’ åreut djouwé siconte di zels et lzî mete tertos sol dos !

PP - Nos aloyîs, les Amerikins, ont acertiné ki l’ missile a pårtou del zône contrôlêye påzès revinteus.

IM - Oyi, 24 eures après, adon k’ il ont veyou çoula å moumint minme. Et i n’ savèt nén co cwand çki l’ avion a stî djondou.

PP - Mins les revinteus s’ ont foirt bén plou racsegnî so l’ eure di passaedje di l’ avion d’ lene savoz. C’ est åjhey : i sufixh di rwaitî l’ aeuraedje et carculer l’ eure di passaedje. C’ est d’ ostant pus åjhey ki ciste avion la passe tos les djoûs al minme eure.

IM - Oyi, mins 130 kilometes pus a Nonne. Et ci djoû la, il a stî disvoyî po sorvoler Doniesse, come si les awiyeus l’ acviernént droet so les missiles.

PP - On a ds ôtès prouves. Tinoz, cist eredjîstrumint d’ on cåzaedje di deus hôts gradés des revinteus. Il î djhèt k’ il ont tapé djus ene avion.

IM - Nén onk, mins troes. Dj’ a schoûté l’ cåzaedje. I cmaxhèt l’ Iliouchine eyet l’ Boyigne. C’ est comprinde boû po vatche.

PP - Adon, inspecteur, vos k’ est si foirt, si c’ est nén les revinteus, kî çk’ åreut yeu interesse a bouxhî djus ene avion d’ lene avou 300 passaedjîs ådvins ?

IM - Vozôtes, monsieu l’ prezidint. O, ci n’ est nén èn ametaedje. Mins s’ fåt i bén admete ki c’ est vos ki rascod les frûts d’ ciste afwaire la. Si vos reyussixhoz a çki totes les djins si leyexhe adire avou voste istwere.

PP - A, a, a, vos m’ fijhoz rire, vormint, inspecteur. Vos n’ riroz nén, vos, cwand vos dzeutrins såront çou ki vos vnoz d’ ravåder ! Avou ça ki vos n’ avoz nole prouve.

IM - C’ est l’ veur, mins vos nerén vos n’ avoz nole prouve po-z amete les revinteus.

PP - Årvey, comissaire.

IM - Disca, monsieu l’ Prezidint. A, ki dj’ î rtuze, djusse ene dierinne pitite sacwè.

PP - Vos cmincîz a m’ les peler.

IM - Ene tchitchêye : cwè fjhént ele, ces batreyes di missiles la, dins l’ redjon d’ Doniesse.

PP - Kéne biesse kesse ! Ele nos waerantixhént.

IM - Da kî, la k’ les revinteus n’ ont nole aviåcion. Adon, vos protedjî siconte di kî ?

PP - Po on côp, dji ricnoxhe ki c’ est la ene boune kesse. Vola l’ response : dj’ a dné l’ ôre di poster la des missiles po nos protedjî d’ on bombårdumint ki pôreut esse fwait pa on bombårdî stratedjike del Rûsseye.

IM - Mins bén seur, pocwè n’ î a ddju nén tuzé pus timpe, les Rûsses !

PP - Ciete, les Rûsses !

IM - Et vos pinsez k’ i vlént bombårder Doniesse, les Rûsses, dabôrd k’ i n’ ont låvå ki des fels soçons !

PP - Neni bén seur, c’ est Kiyev k’ åreut yeu stî lugnî.

IM - Come di djusse, biesse ki dj’ so ! Mins dijhoz mu, al fén des féns, si vos vlîz protedjî Kiyev, pocwè astaler vos batreyes di missiles dilé Doniesse, 800 km lon did la ?

PP - Alez å diåle comissaire; å diåle et co pus lon ! Vos m’ froz tourner a bourike, ttaleure, avou vos kesses et vos messes ! (inte ses dints) Dj’ a ene guere di propagande a wangni, la, mi.

Ratourné pa Pablo Sarachaga, li 2 d’ awousse 2014

*************************

Istwere & ådjourdusté : pogrom a Rhaza

A s’ catchî divins on trô d' sori

Di 1850 a 1945, sacwants payis d’ Urope (Rûsseye des tsårs, Almagne des Nazis) ont-st ataké a macsåder des djwifs, rén k’ po leu plaijhi. C’ est çou k’ on-z a lomé les « pogroms » (Rûsseye) pu l’ olocôsse (Almagne des Nazis).

Di tot ç’ tins la, dins l’ monde arabe, les djwifs et les muzulmans viként onk dilé l’ ôte, nén cmaxhîs, mins sins trop d’ eguegnes.

Dimandans « Judenstaat »

A cmincî d’ aviè 1900, les djwifs, kitchessîs d’ Rûsseye et d’ avår la, dimandît k’ on lzî leye ene tere rén k’ por zels, li « Judenstaat ». Les Sovietikes, k’ avént disdjoké les tsårs, les vont ahessî, tot-z askepiant l’ Oblass otonome djwif. C’ est el Sibereye, tot do long do mouze « Amour », astok des Chinwès. Li yidich î est l’ lingaedje oficir. C’ esteut e 1934.

Do costé des Almands, k’ åreut on dvou fé po s’ fé pardoner d’ l’ Olocôsse ? Fé on « Judenstaat » ene sawice e l’ Almagne, e l’ Noere Foistreye ou el Basse Sake, mi shonne-t i.

Asteure waitîz bén çou ki s’ a la passé.

Å disrashonnaedje di l’ Impire otoman, après l’ guere di catoize, les Djwifs amerikins ont atchté, po pîce di pwin, les grands haswès [domaines agricoles] del Palestene, k’ estént ås mwins di bordjoes trouks, k’ endè ralént e leu payis. Pu, pitchote a midjote, esse prôpietaire di grandès stindêyes di teres. Eyet, e 1948, avou l’ benediccion do govienmint estazunyin, tchessî les Palestinîs k’ estént dins l’ cotoû.

Les Inglès, les mambors del Palestene, estént disconte ces « terorisses djwifs » la. E 1948, c’ est on djenerå inglès k’ a ndalé d’ Djordaneye et ocuper Djeruzalem-Ess, po-z espaitchî les Siyonisses di fé mwin basse so tote li veye. Mins, docô après, les Inglès ont dit åmen ås dictêyes do grand fré amerikin. Et ricnoxhe Israyel.

A pårti d’ adon, on-z a veyou dvant ses ouys li dierinne grande wache di colnijhaedje do 20inme sieke. Di pattavå l’ Daegn, les djwifs, k’ oyént l’ bassinaedje des siyonisses, ont-st aploû po rimpli l’ novea estat.

Wice sont i, les efants d’ Abråm ?

Kî k’ c’ esteut, ces djwifs la ? Des ptits-efants da Abråm ?

Nonna ca nonna. Ben Gourion lu-minme, onk des askepieus di l’ estat d’ Israyel, èn istoryin di s’ mestî, l’ a scrît noer so blanc dins onk di ses lives. Les dischindants da Abråm, på sonk, c’ est les ptitès djins k’ ont dmoré dins les campagnes del Palestene après li tchessaedje-evoye des priyesses pa les Romins e 70 après DjC. Des ptitès djins ki n’ polént pus pratiker leu rlidjon djwive, bråmint rashiowe so des ofrixhaedjes [sacrifices] di biesses å timpe di Djeruzalem, ki vneut d’ esse bouxhî djus. Adon, beacôp d’ zels si cviersît [convertirent] å crustinnisse, bråmint pus åjhey a shuve ki li « lwè Moyisse ». Pu, diviè l’ an 700, cwand Omar Ben Xhettab prinda Djeruzalem sins ene gote di sonk, bråmint passît a l’ islam, li novele môde et l’ prumire foice politike do moumint.

Les priyesses et les tchîfs djwifs ont don stepé evoye e 70, et askepyî li « diyaspora ». Kimint ? E-z assaetchant e leu rlidjon totès djins des payis k’ i s’ î avént rassåvé : Urope do Levant, Afrike bijhrece, Espagne, Impire romin djermanike. Pu, e 20inme sieke, l’ Amerike bijhrece. C’ est totes ces djins la, stombeyes pal propagande siyonisse, k’ ont-st abroké e-n Israyel, di 1948 a… asteure.

Candjmint d’ innmi

Et, zels, riclamer ki leu-z innmi, ci n’ esteut pus les crustins uropeyins, ki ls avént macsådé dispu l’ tins des croejhådes, come « li peupe k’ a touwé l’ Bon Diu ». Ci n’ esteut ki d’ djusse, puski les gros colés do novea estat, c’ esteut tertos des blancs, bråmint des Almands et des Amerikins, les pus ritches del binde. Asteure, l’ innmi, c’ esteut les Arabes, ki s’ avént rmetou eshonne on moumint (di 1950 a 1975) po rvindjî leus frés d’ lingaedje, les Palestinîs.

Insi, l’ Urope et les Stats Unis divnît les mambors d’ Israyel. E 1956, c’ est des tanks inglès et francès k’ aspalît li djonne årmêye israyelyinne po voleur riprinde li tchenå d’ Souwesse [canal de Suez] ås Edjipsyins, k’ î avént portant droet après 100 ans come dit dins l’ martchî.

Les cwate cénk prumirès gueres Israyel-Payis arabes, c’ esteut des gueres « oniesses », avou deus innmis foirt å foirt. Mins, dispu 1975, cwè çk’ on-z a veyou ? Les Arabes, cohigne cohagne inte di zels, n’ ont pus saetchî on côp d’ fizik po disfinde les Palestinîs. Les Israyelîs avént l’ tchamp libe po-z eterprinde leu såme prumrece : colnijhî tote li Palestene.

Dispu don, come des bandiys foû-lwè, Israyel a rî å nez di tos les payis del Daegne, tot n’ respectant nén on seu des decidaedjes di l’ ONU. Et riprinde, a l’ årvier, li sistinme des pogroms : macsåder les Palestinîs a grands côps fiziks et d’ ôbus.

Li cas d’ Rhaza est plin d’ acsegnmints. E 2007, Israyel ressere li teritwere come ene prijhon a l’ air libe. Frontires teresses serêyes, mer recloyowe pa des bateas d’ guere k’ espaitchèt minme les pexheus di fé leu mestî. Les deus miyons d’ djins d’ låvå n’ ont ki l’ droet d’ vicoter, et-z awè fwin dipus sovint k’ a leu toû. I n’ ont nén l’ droet di s’ disfinde, zels. S’ i saetchèt ene fayeye minifuzêye, ki dgrete èn Israyelî, c’ est l’ Estat-bandiy ki rboerlêye k’ il a l’ droet a s’ disfinde. Et-z aler touwer des dijhinnes di djins avou des ôbus al dierinne môde ou des stoks di bombes å fosfôre k’ estént arivêyes a leu date di disvalixhance (e 2009).

Al dierinne mangonreye di l’ esté 2014, end ont schafyî dipus d’ 2200 (1500 civils, al boune). Et coixhî des meyes di djins. Bouxhî djus 5000 måjhons, totes les oujhenes, li cintråle electrike et les voyes d’ aiwe, pår les scoles et les moskêyes. Di l’ ôte des costés, gn åreut yeu ene septantinne di touwés (avou 65 sôdårds). Onk po 30. Li veye d’ ene djin n’ a nén l’ minme valixhance tocosté !

Et nozôtes, est çk’ on n’ schoûte nén tofer li minme clotche ? Et ci n’ est nén l’ cene des ptits k’ on spotche. Et sotni les spotcheus !

Honteus k’ on dvreut esse ! A s’ catchî dins on trô d’ soris.

Lucyin Mahin, li 10 d’ awousse 2014

*************************

Istwere del guere di 14 / Rilomés viziteus del Walonreye

Kurt Suckert Malaparte å Bork

C’ est ene bele pitite cope. Leye su lome Enrica Yvonne Dilk. Lu, on l’ lome Alberto Belotti. I sont Itålyins et sont professeurs a l’ univiersité di Milan.

Å no del soce « Tere et Abeye di Sint-Houbert », dji les a rçû po les documinter et les moenner dins les cwirreyes ki madame Dilk, di l’ « Instituto di Lingua e Letteratura tedesca, Universita Cattolica a Milano », fwait sol passaedje di Curzio Malaparté å Bork (Sint-Houbert).

Kî est ç’, ci-la, li Curzio Malaparté ?

Kourte Zoukerte Malaparté, sorlomé Courzio, c’ est on scrijheu itålyin k’ a vnou å monde a Prato e 1898 et k’ a morou a Rome e 1957. Raconteu di tåvleas foirt deurs et cinikes del veye d’ ådjourdu dins ses romans – « Capoute » (1944), « Li pea » (1949), « Ces Sacrés Toscans la » (1956) – et totes ses pîces di teyåte.

Malaparté a scrît tote l’ istwere di s’ vicåreye et c’ est a pårti di ç’ live la ki madame Dilk ricwirt. Ele mi raconte ki Malaparté a stî foirt estomaké pa l’ piete del bataye di Caporetto e 1917 disconte des Otrichyins.

Caporetto…

Dins les grandès eciclopedeyes, on trove li contaedje del dobleure itålyinne di Caporetto, ene pitite veye, cwarante kilometes å Nôr-Ess di Vnijhe. Les Itålyins ont corou evoye disk’ a l’ aiwe di Piyåve. La, refoircis pås tropes franco-inglesses, il ont parvinou a arester les Otrichyins.

E moes d’ djanvî, les aloyîs sont mwaisses del bataye del Piyåve et s’ vont i cmincî a rmonter a l’ assåt.

Cwand ça s’ a passé, les oujhenes itålyinnes estént a deus doets di s’ mete e greve. Les sôdårds end avént leu sô et l’ payis aléve capituler.

Tot lijhant li fén des cénk pådjes dins l’ eciclopedeye et pus lon, dji voerans si Malaparté dit l’ minme :

« Po l’ Itåleye, li pus grand må a fwait l' pus grand bén ! I fåt dire ki les tropes franco-inglesses n’ ont waire etervinou dins l’ bataye. Et portant, elle ont yeu on grand côp d’ efet sol morå des Itålyins tot mostrant ki les payis aloyîs les sotnént di totes leus foices. »

« Avou Caporetto, les Itålyins avént yeu on fameus côp d’ pougn al frimousse. Il ont rsintou ça come ene grande indjustice. Lu nåcion, k’ esteut a mitan edoirmowe discar la, si va rewoeyî dins on sorsåt patriotike. Et ça s’ va rsinte kékes moes pus tård. »

Malaparté amon nozôtes

Dji rtrovans Malaparté e prétins 1918 a Blegné-dlé-Rénse [Blégny-lès-Reims], dins des tropes itålyinnes ki s’ batèt å costé des aloyîs. Il est decoré come oficî di grande valeur. Mins les sofocant gåz ki les Almands lancént so les sôdårs ont distrût ses peumons. Il è va sofri tot l’ restant d’ ses djoûs.

Après l’ årmistice, on l’ va rtrover dins des missions a Biarin, a Oufalijhe, a Rotchô. C' est adon k’ il a s’ pît-al-tere å Bork : del fén do moes d’ nôvimbe disk’ al fén do moes d’ decimbe 1918.

Les pus vîs k’ nos si raplèt bén des sôdårds itålyins k’ estént å Bork e dijh-ût. Mes deus frés m’ end ont sovint cåzé. Il avént minme e gurnî on casse d’ Itålyin.

Malaparté dimoréve dins ene tchambe a l’ otel-restorant da Arsinne Vayant, so l’ plaece do Martchî, amon l’ grand- pere di l’ ancyin gaztî sportif do minme no.

Dins les anales di l’ Institut Sint-Djôzef a Såceure-Casbork [Carlsbourg], on pout lére : « Do 29 di nôvimbe å 28 di decimbe, li djenerå Garibaldi dimeure dins nos bastimints avou ene pårt del brigåde Alpi. » Ene ôte trope avou des oficîs (inte di zels Malaparté) et des sôdårds sont-st a Sint-Houbert. Les oficîs ont leu djîsse e l’ Måjhon do Peupe ki les Almands ocupént avou leu comandateure tins del guere.

Malaparté lodje djusse a l’ adroet d’ la. C’ est dins ene tchambe di l’ otel Vayant ki Malaparté va scrire si prumî roman « Viva Caporetto ». I l’ dit lu-minme dins s’ biyografeye : « Fu appunto in Belgio, a Saint-Hubert, che io scrissi quel moi primo libro… nel mese di dicembre che segui l’armistizio… »

Malaparté raconte ossu : « A l’ adroet di m’ tchambe, i gn a li restorant-cråxhreye « Å vî singlé d’ Årdene » et l’ « Grand Cafè Univiersel ». Dj’ aveu pacô målåjhey di m’ concintrer paski, totes les nutes, on î criyive, on î tchantéve, on î danséve po fiesti l’ wangne et l’ årmistice : « qui di sera risuonato i canti al ritmo del rommelpot, la variante flaminga d’ uno strumento musicale nel centro e sud Italea » Est çk’ i n’ nos prind nén po des flaminds !?

Malaparté a fini s’ live a Varsoveye e 1920, cwand il esteut ataetchî d’ presse a l’ ambassade d’ Itåleye po raconter çou ki s’ passéve dins l’ guere civile rûsse k’ a shû li revolucion di 1917.

Emile Pècheur, li 9 di djulete 2014

*************************

Spôrts : Les tchafiaedjes do Ptit Louwis (32)

El cope do monde å Braezi

Dji vos åreu vlou dvizer do Toû d’ France. Mins ba, tos les cwatre ans, c’ est l’ cope do monde !

Il avént stî a cwate, tot come les mosketaires. E-n avion eyet lodjî dins ene måjhon d’ on cuzén d’ on vî cousse, dalé låvå vinde des påstaedjreyes.

- Po on côp, dj a tapé l’ avarice å diåle ! Kéne avinteure, mes djins !

El fåt comprinde : i vneut d’ fé on voyaedje di 16 eures. Lu ki n’ aveut djamåy monté dins ene avion ! I n’ esteut nén a s’-n åjhe.

Adrovaedjes 

Il estént don a Saw Pawlo. El ceremoneye d’ adrovaedje – metowe e plaece pa deus Walons – a poenne fineye, c’ est l' match di strimaedje Braezi-Crowaceye. Côp d’ tonwere ! Marcelo markêye conte ès camp après 11 munutes di djeu. Mins l’ Braezi l’ a tout d’ minme epoirté pa 3 a 1.

- Dj’ aveu roubliyî di vos pårler des deus noveatés. El prumire, c’ est ene bombe come del schome a raezer, po marker ene lene durant vint sigondes. Çoula, po plaecî on meur cwand gn a on côp-franc. L’ ôte, c’ est l’ monte di l’ årbite ki, cwand gn a l’ balon k’ passe el lene del gayole, ele markêye mierseule el sémpe mot « gôl ».

El deujhinme pårteye ès passéve a Natal. Rola, ebén, i n’ ploût cåzumint djamåy. Dayeur, gn aveut des tribunes sins toet. Ebén, i drachive et gn aveut les grossès aiwes dins l’ veye.

Po shure, gn a yeu l’ tatouye di l’ Espagne 5 a 1 disconte del Holande, avou on bea bute del tiesse da Van Persie. Les ôtes payis vijhéns del Holande ont bén comincî : l’ Itåleye, el France eyet l’ Almagne passént tertos.

El toû des Rodjes Diåles

El mårdi, c’ esteut l’ toû des Bedjes. Il ont leyî l’ otel Paradise a Mogi das Cruzes po prinde l’ avion et ariver a Belo Horizonte. Ça aveut bén må comincî cwand Vertongen a fwait on coirner eyet c’ esteut zero a onk po l’ Aldjereye. E rintrant adon k’ i dmoréve vint munutes, Felini a fwait onk partot d’ on côp d’ tiesse. Mins cwand Mertens a marké, c’ esteut l’ foleye. Les Diåles sôrtixhént di l’ infier !

- E ç’ pårteye la, dj’ esteu dins les tribunes ! Mins dji les a veyou cåzu tertotes dins l’ boesse ås imådjes !

Ene sorprijhe : après seulmint deus pårteyes, l’ Espagne, tinante do tite, est eliminêye. Cwarante-ût eures pus tård, c’ est l’ Inglutere k’ a shû l’ minme voye a cåze des deus gôls da Suarez, ki djowe… dins ene ekipe inglesse.

Mins dedja arivéve el dimegne avou l’ pårteye conte les Rûsses.

Dins li ståde di Maracana, cwand Hazard a dné l’ balon a Origi, nos esténs a l’ 88inme munute et c’ esteut onk a rén. Bon po l’ cwålificåcion po les ûtinme di finåle, avou tolminme ké rzultat sconte el Corêye do Sud. Ci n’ esteut nén ene grande pårteye, mins djusse el pitite gayole k’ i faleut.

- Djam ! Ké geuye di bwès el leddimwin ! Pire, dji n’ aveu waire doirmou. Aprume ki dji vneu d’ rescontrer ene comere (waitîz l’ foto). Ureuzmint, låvå, il ont des rmédes miråkes. Boere di l’ aiwe di coco eyet mindjî ene maxheure avou des poes d’ açay. Et ça va totshûte mî !

Vént adon l’ toû di l’ Itåleye di prinde l’ ouxh, tapêye wôrs pa l’ Ourougway.

El troejhinme pårteye des Diåles a Saw Pawlo n’ a nén stî teribe nerén, mins il ont wangnî pa onk a rén.

C’ esteut do nouv dissu nouv eyet l’ droet di rescontrer les Estats Unis e ûtinme di finåle.

Ûtinmes di finåle

Les ûtinmes comincît don avou les favoris. Il ont yeu tchôd. El Braezi s’ a cwålifyî ås saetchîs des penaltis sconte el Tchili. Po les ôtès pårteyes, pont d’ sorprijhes. El France, l’ Almagne et l’ Holande ont passé l’ toû.

Tant k’ a Ptit Louwis et ses camaerådes, il avént decidé d’ endaler el mårdi a Salvadore di Baya po vir l’ ekipe bedje. I stént come des efants k’ on lzî tind ene bouboune. Ureuzmint k’ i n’ payént nén l’ lodjmint eyet minme el nouriteure. Rola, c’ esteut gråce a Ptit Louwis. El comere k’ il aveut rescontré aveut des liårds puski ses parints avént fwait fôrtune dins les plantåcions di cafè. C’ est leye ki fjheut preparer a mindjî po les cwate mosketaires.

- C’ esteut ddja assez tchir avou les transpôrts eyet les biyets d’ intrêye ! Èm tchåssete end aveut prins on fameus côp !

El mårdi arivéve. On ptit toû dins l’ veye eyet radmint el pårteye comincive. C’ esteut on nul-blanc a l’ fén. Il aveut falou on teribe Tim Howard dins les gayoles des Stêtes. So l’ fén del prumire rawete, Loucacou a passé l’ balon a De Bruyne eyet c’ esteut onk a rén. Radmint, el minme Loucacou a fwait deus a rén. 

- Nos estént a pô près shijh cints, mins gn aveut do brut po des meyes et co dpus. L’ avinteure ni pleut ki continouwer. Nos sténs e cwårt di finåle et faleut djouwer conte l’ Årdjintene da Messi.

Adon-pwis…

A Braeziya, el deujhinme ekipe el pus djonne del competicion (nozôtes) a radmint stî moennêye. Higuin a marké a l’ 8inme munute. Damaedje, el piete di bale da Kompany eyet l’ målureuse deviyåcion da Vertonghen. On maxhaedje di poenne avou eto del firté. No Ptit Louwis aveut shû l’ afwaire e direk do Braezi.

Après l’ eliminåcion, les cwate cousses estént tolminme disbåtchîs. Di dzespwer, il ont decidé d’ ervini å payis. Cweki, avou ene miete di rgrets po Ptit Louwis. Vos l’ pinsez bén… avou s’ comere.

Les cwate dierins estént l’ payis organijheu eyet l’ Almagne, l’ Årdjintene et li Holande. Po les dmeyès finåles, les Orandjes n’ ont seu vindjî les Diåles mågré k’ les Årdjintins n’ volént nén fé do djeu d’ accion. El finåle esteut don Almagne-Årdjintene.

C’ est e l’ Beldjike k’ il ont waitî l’ finåle. Dins l’ Maracana wou çk’ il a falou l’ 113inme munute po vir Gotz ofri l’ fameuse cope do monde a l’ Almagne.

Cwand leu-n ekipe a rvinou a Berlin, kéne dicåce, låvå ! Dipus di 400.000 djins k’ estént dissu les tchmins po vir passer leu-n otocår et lzî fé fiesse. Ôte tchôze k’ el delegåcion bedje avou leu tiesse d’ etermint et leu noer costume po ene ceremoneye di cénk munutes padvant l’ palås do Rwè a Brussele.

Mins Ptit Louwis aveut rvinou avou on moncea di sovnances dins s’ tiesse et dins s’-n aparey foto. Kés bons moumints gråce å fotbale eyet eto a…

Mins durant cwénze djoûs, i rwaitreut co l’ toû d’ France eyet radmint après, ci sereut l’ cominçmint do tchampionat bedje avou po l’ drovi Standård esconte Tchålerwè !

Jean Goffart, li 26 di djulete 2014, dispu l’ Braezi

*************************

Rilidjon

Sourdants del Nosse-Dame d’ awousse

E calindrî lunrece, li 9 do moes ab, c’ est l’ djoû ki l’ Timpe di Djeruzalem a stî dismoli. Il î a stî deus côps, e l’ an 586 divant l’ Crisse pås Babilonîs, pu e 70 après l’ Crisse, på Romins.

Dins l’ calindrî solrece [solaire], ci djoû la, ciste anêye la, tcheyeut emey awousse.

Ripoize di l' Aviedje

Après l’ deujhinme dismolixhaedje do Timpe, les djwifs nén-crustins alît braire tos les ans so les dismolixheures, e rmimbrance do Timpe. Les djwifs crustins, po wårder l’ uzance d’ on perlinaedje li minme djoû, alît dlé l’ monumint Rachele, a troes meye ascoxheyes di Betleyem, ewou k’ i gn aveut èn aiwî (on pousse).

Å deujhinme sieke gn a yeu on scrijhaedje, li boigne evandjîle [évangile apocryphe] sorlon Djåke, ki djha ki Djôzef li Scrinî aléve viè Betleyem avou ses efants et l’ Aviedje Mareye so èn ågne. Et ki, cwand i fourît « a troes meyes hazêyes di Betleyem », Mareye dimanda po s’ ripoizer ene miete a l’ aiwî. Et k’ po fini, c’ est la k’ elle a metou Djezus å monde, divins ene bôme k’ i gn aveut la.

Ça fwait ki, avou l’ timp, les crustins ki vnént fé l’ voye po rmimbrer l’ Timpe di Djeruzalem, s’ ont metou a rmimbrer purade li « rpoizaedje » di l’ Aviedje Mareye, li « timpe do Bon Diu ». Et l’ djoû a stî l’ 15 d’ awousse, veyanmint k’ i n’ sepént pus cårculer les djoûs d’ après l’ calindrî lunrece. Li plaece s’ a rlomé Bir el-Qadismou (« li sint pousse »). Ons esteut e 417.

« qadismou » (sacré) a stî rcomprins e grek come « catisma » (ashida, sidje), ey ons a basti ene glijhete do rpoizaedje di Mareye e l’ an 455. Li rpoizaedje a stî rcomprins po esse li moraedje di l’ Aviedje. Mins des ôtès djins ont sondjî ki s’ fosse esteut a Djeruzalem, ewou k’ il alént deus djoûs pus timpe, li 13 d’ awousse. Co des ôtes ont dit ki l’ tombe di l’ Aviedje esteut a Efeze. Pitchote a midjote, ons a basti des gléxhes di l’ Aviedje pattavå, avou tchaeke ene date di dicåçtaedje [dédicace] diferinne, ki divneut li grande fiesse sinte Mareye.

C’ est Rome ki decide

On bea djoû, l’ impreur Morice a bouxhî l’ pougn so l’ tåve. Li fiesse-djoû sereut po tertos li 15 d’ awousse.

E Coûtchant, li fiesse s’ a lomé e latén « Dormitio beatæ Mariæ virginis », aprume l’ « edoirmaedje del beneye viedje Mareye ». E grek, ons a ratourné ça « kimesis ». Les Årmenyins l’ ont lomé « verapoxhoum », ki c’ est l’ « ahapaedje », come po dire ki l’ Crisse ouxhe « ahapé » s’ mame å cir, dilé lu. E minme timp, èn ôte boigne sicrijhaedje a stî metou so papî : « Transitus Mariæ » : l’ ebagaedje da Mareye.

Viè l’ nouvinme sieke, les djins d’ Gåle ont tapé l’ mot « Dormitio » evoye, et l’ riplaecî pa « adsumptio », ki c’ est l’ ratournaedje di l’ årményin « verapoxhoum ». Li påpe Djelaze a hiné l’ live di l’ « Ebagaedje da Mareye » evoye, tot djhant ki c’ esteut tos boignes contes.

Li liturdjeye crustinne di cåzumint pattavå (åré di dvins les Assiryins) fiestixh ene Nosse-Dame d’ emey awousse. Å sopoizer ki, cwand l’ Aviedje Mareye a morou et k’ on l’ a-st eteré, elle a stî rhapêye å cir, foû di s’ fosse. Les imes et les antyinnes del fiesse el tchantèt bén.

Li rite latén esteut portant assez coixhe [timide]. L’ oremusse del fiesse do 15 d’ awousse dimande seulmint å Bon Diu d’ schoûter les priyires del « Mame di s’ Fi », sins dire ni frisse ni frasse di l’ edoirmance ou d’ l’ « ahapaedje » di Mareye. On lét on boket do live di l’ Eglijhastike rapoirt al sûtisté(1), ey on boket d’ l’ evandjîle sint Luk rapoirt a Måte et Mareye(2) les sours da Lazåre.

E 1950, li påpe Pî XII a eråmé [entériné] li doke di l’ ahapaedje di l’ Aviedje, et candjî pår tote li liturdjeye del fiesse.

E walon, on lome li 15 d’ awousse « Grande Notru-Dame ». Pareymint dins des ôtes lingaedjes : e roumin (« Sântã Mãrie Mare ») ey e hongrwès « Nagyboldogasszony ». E-n itålyin, c' est biesmint « Ferragosto » (fiesse awousse).

Divins les Årmenyins, li liturdjeye del fiesse est l’ minme ki po les benixhaedjes di gléxhe, çou ki mostere foirt bén li sourdant del fiesse, ki c’ est l’ Timpe di Djeruzalem.

Djôr Sfasie, li 12 di may 2014

*************************